祥記美食

Open Now

Now Closed

之前跟和你Pay搵到一間好正嘅街坊小黃店，舖仔細細但食物選擇勁多，價廉物美，午市客飯或即炒粉炒麵連飲品只係$40左右，仲要係即叫即整又好食，阿姐同哥哥仔勁有禮貌👍 ，絕對可以做飯堂！講返食物質素，真係超值，無論係我自己單拖定係同埋同事一齊去食，平均一個星期最少食一次，我自己就算日日食都唔會覺得悶，因為除咗餐牌上有嘅嘢之外，只要你叫得出而佢哋又有材料嘅，阿姐都會整俾你。我自己最鍾意食佢嘅涼瓜牛肉炒麵，麵身有蛋香，既有脆脆麵又有彈牙淋身部份，涼瓜保留咗佢嘅鮮甜味之餘又有微微天然苦澀味，牛肉有醃過所以唔會好韌，但又唔係用鬆肉粉”嗱”到無哂味嗰隻，加上佢落咗豆豉炒，所以又香又惹味，最重要係食咗咁多次，次次食到尾都無話碟底剩返一大灘油，抵讚👍另外我哋基本上都試咗佢哋大部份嘅碟頭飯、炒粉麵飯、車仔麵、三文治同小食，次次我同同事都覺得好味，無話有伏，至於飲品方面都係正常茶記質素，難得嘅係佢哋有鮮榨果汁、夏枯草及豆漿，同事最愛西瓜汁，我飲過五青汁都係好新鮮，其中西芹味最重，但怕草青味的朋友就未必接受到。