匯味堂 (Closed)

大角咀嘅餐廳一向高手如雲，今日搵咗間朋友介紹嘅串燒店過過口癮。門面唔太起眼，空間略細，但陣陣肉香味傳出。員工服務態度好好，一開頭我哋冇book位就walk-in，佢帶咗我哋近門口嘅位坐低，仲不停講唔好意思要我哋坐門口，招呼好周到。入正題講食物先：10分推薦佢個燒青口、泰式燒豬頸肉同燒煙肉包荔枝（唔太記得詳細個名）。個燒青口非常新鮮，食之前先飲一飲個殼上面嘅海水再大啖食青口肉，非常惹味。燒豬頸肉本身唔算話超級出色，但係佢哋自家製嘅醬汁真係冇、得、頂，嗰種泰式得來又帶點港式味道嘅辣，真係非常開胃，我哋之後嘅每一個燒烤都有蘸個醬汁。個燒煙肉包荔枝配搭有驚喜，荔枝清新嘅味道中和左煙肉嘅肥膩，冇諗過兩者夾埋一齊有咁樣滋味。其他嘢食都唔錯，算係水準之上，值得一提嘅員工服務態度真係非常有禮貌，小店雖小，但成餐飯食得好滿足，一定會推薦更多朋友光顧。