燒喜 (Closed)

大家黎到天后，除左諗起維園大球場外，仲會諗起咩呢？自從今日以後，小編就會諗起係施弼街既一間串燒店—「燒喜」。首先係因為店內嘅環境都幾舒適，店面雖則唔算大，但座位都算闊落，感覺係特別適合同好朋友傾下計，慢慢食嘅休閒串燒店咁，而且老闆都幾親切，所以小編印象都特別深刻。除此之外，店內嘅食品都幾吸引，特別係串雞皮，雞翼燒同京葱牛肋粒。先講「雞皮」啦，雞皮炸得好鬆脆可口，調教味道都適中，價錢亦合理，小編覺得可以再食多次，但缺點就係雞皮串埋一齊太薄，進食方面就比較難啲。其次就係「雞翼燒」，老闆事先將雞翼一分為二，方便客人進食，呢個細心行為的確抵讚，而且味道唔錯，雖然只係用鹽黎醃製，但亦都唔會蓋過原先嘅肉味，反而將雞翼嘅味道更加帶出黎，所以小編誠意推介俾大家，希望大家可以黎試下。最後係「京葱牛肋粒」喇，牛肋粒同樣都係用鹽醃製嘅，仲配上甜甜地嘅醬汁上面，同時老闆都再次好用心咁將牛肋粒嘅邊燒到脆口，當夾起牛肋粒再連埋爽口嘅京蔥一齊食嘅時候，仲可以加添多一份清爽甜嘅層次感，將肉味更加昇華。總結而言，小編認為要求唔高嘅人，都可以黎呢間小店一試嘅，除左試呢度嘅食物，最重要仲可以一嘗呢度親切嘅人情味添。