第壹間(重慶雞煲)火鍋 (Closed)

在大水坑村補完習，幾乎每次都聞到香味，我知係呢間雞煲傳出來，於是今日終於扚起心肝約朋友試吓。靠窗的三個卡座都有客，我和朋友惟有坐一張略嫌大的四人方枱，一個半隻雞連湯料的雞煲是基本盤，於是我們點了惹味薑葱醬雞煲，我們都過了狂食牛肉的年紀，於是主力食白肉，點了花膠、魚肚，仲有墨魚滑、魚皮餃拼白魚蛋（咦，數落真係全魚宴嚟喎），同埋一個雜菜籃。先來湯煲，可能因為醬湯，望上去有點杰撻撻，但一起滾就好香，而且好足料，雞件食極唔完，但個湯愈滾愈杰，愈杰愈鹹，我食食吓倒咗自己杯茶落去~花膠望上去白雪雪，我第一眼認唔到它是花膠，到放落煲煮腍咗，放入口就好sure係花膠了，有花膠獨特的海味味，口感滑嘟嘟。魚肚就一眼睇得出，即平時在酒樓食那些「棉花雞」的「棉花」，不過呢度的「棉花」好厚肉，好飽肚，而且好襟煮，絕對唔係滾兩滾就得，要腍滑，真係要畀啲耐性~ 白魚蛋鮮味彈牙，魚皮餃就普通咗啲，但絕對唔係難食~墨魚滑好鮮味，一早聽學生家長講呢間嘢的蝦滑和墨魚滑好食，果然係真~雜菜籃一切正常，冇咩特別~