牛品台式火鍋

Open Now

Now Closed

餐廳由屢獲殊榮嘅台灣廚師李龍翔師傅主理，主打120分鐘台式火鍋放題，價錢有4個等級，以牛肉質素區分。湯料每日由台灣新鮮直送，有多達10款湯底選擇，更設有地道配料、小食同甜品供應，唔洗搭飛機就食到啦～ 近期新出咗兩款湯底，分別為綠野仙蹤濃湯同青花椒和牛鍋，要咗前者，集合鮮香甜口味，濃郁芫荽香氣撲鼻而來，芫荽控千祈唔好錯過！題外話，收碟速度都唔算好慢，而且座位幾闊落，坐得舒適。肉類方面大大力推介澳洲M9和牛肩胛肉，肉質軟嫩細緻，牛味濃厚、美國牛小排同肩胛肉都唔錯、醉雞大塊入味、紐西蘭羊卷肉散發獨特香氣，另外仲有豬同海鮮款式，正常發揮，想食回本都係建議點和牛啦🤭呢度提供多款台灣夜市小食，鹽酥雞、椒鹽蝦、炸花枝丸、黃金酥炸魚蛋、牛三寶、甜不辣、五味墨魚仔、宜蘭蔥餡餅、炸午餐肉等等，個人喜歡蘭陽糕渣、香腸同皮蛋豆腐，逐件嗌，不過可能係即整嘅關係等候時間比較長。自助區有各種蔬菜、炸物、主食、小食、水果、甜品同飲品。最驚喜莫過於甜點區，有得自製台式糖水、綿綿冰同雪糕，可以自己mix and match，好睇又好食，大人小朋友都啱，讚👍