妹記大排檔

Open Now

Now Closed

人生就是不停的戰鬥，是九把刀的名句。但係喺開拖之前，梗係要整返碗戰鬥碗啦！你都可以話我係衝住呢隻戰鬥碗而嚟呢度食飯嘅，因為之前喺網上面見到呢隻碗都覺得好過癮，咁啱巴打有聚會，就一於嚟呢間店妹記大排檔朝聖啦。一場嚟到，唔係唔飲酒啊嘛？當然要喇喇臨整返碗啤酒先。呢度比較特色就係有哈爾濱啤酒，我之前真係未見過。不過飲落都清清地，幾好味嘅。同時，另外一個重點就梗係用戰鬥碗嚟裝啤酒飲啦，用碗飲酒係幾特別嘅。不過在場見到的戰鬥碗好多都有啲破損，有啲扣分，同時間飲嘅時候都要小心戒嘴。向好嘅方面諗，呢一隻係一隻好有歷練嘅戰鬥碗，戰鬥咗好多次😂😂😂😂😂講完無謂嘢之後，就介紹下啲餸菜啦，招牌菜係鬼馬油炸鬼。呢個首本名菜當然係必點嘅啦，就係油炸鬼再配合墨魚滑，做到外脆內軟，真係幾盞鬼。蒜香骨。炸完出嚟熱辣辣，賣相亦都唔錯，不過食落就有少少鹹，不過都幾香口，用嚟送酒一流。鹹蛋蒸肉餅。呢個家常小菜都整得還好，肉餅都幾入味，呢個就適合用嚟送飯喇。不過呢度嘅小菜都有個弱點，就係分量太細，如果係女仔食應該還好。男仔食就真係未必夠喉喇。