海睿日本料理 (Closed)

因為小學同學個阿媽番頭嫁又生咗 baby嘅關係，我去咗東涌去拿薑醋，伯母好友善咁樣拖住我隻手帶咗我去呢一間食日本嘢， auntie 真係友善到呢，真係抵佢步入黃昏都仲可以覓到真愛 ~燒泡魚乾，味道甜甜地甘甘地，食落去唔係好硬係軟軟地，點埋啲沙律醬都幾好味玉子燒，玉子做得嫩嫩滑滑，食落去味道好有雞蛋味，溫度唔係好熱又唔係好凍， 其實我唔係經常食玉子燒，所以唔知道算唔算係做得好，不過我就覺得好好味。龍蝦拉麵，真係成世仔都未食過日式龍蝦拉麵， 拉麵個麵湯好好飲好好味，個龍蝦就燒得好香好有龍蝦味，食碗龍蝦拉麵感覺自己好似好高級咁。仲叫咗牛利串燒，牛脷好軟好香。