村爺爺車仔麵

Open Now

Now Closed

今次專程來食佢哋嘅新野....原隻龍蝦車仔麵, 以前食車仔麵係因為平, 一碗麵加幾個餸可能要二三十元搞掂, 而家喺荃灣食個四餸車仔麵接近$80, $80我不要如食好啲, 黎村爺爺食半隻龍蝦車仔麵, 加多$20仲有三個餸及油菜, 抵食好多。半隻龍蝦配特濃龍蝦湯伊麵 ($68/特價)升級版只需加$20便可以叫多兩個車仔麵餸及送油菜一碟, 佢哋個手打烏冬超正, 原本想轉手打烏冬用黎索龍蝦湯的, 可惜賣曬, 唯有轉普通烏冬。絕不欺場, 半隻龍蝦蝦肉頗厚肉, 兼附紅+綠軟硬蝦膏。龍蝦肉結實彈牙, 甜甜地都幾好食, 蝦膏就當然係甘香啦, 龍蝦濃湯呷得出真係用龍蝦頭殼煲出來的, 湯頭充滿龍蝦嘅甜香, 鹹鹹鮮鮮要嚟做湯底好正! 如果你鍾意食更索汁嘅伊麵會更加正!今次叫咗最傳統嘅車仔麵餸成寸厚花菇, 炆得爽滑入味。軟滑豬紅及吸湯爽口豬皮, 最傳統嘅車仔麵餸, 豬皮是百食不壓的。最正係後加的蘿蔔, 又腍又甜又多汁, 仲要系冇渣的, 必食item。半隻龍蝦+餸+麵底+特濃龍蝦湯+汽水, 一百有找, 平民美食。