I-O-N (Closed)

大年初二行吓中環街市好有新年氣氛，午餐就去咗呢度食！望落去餐牌好似有少許貴但係其實佢係包湯或者沙律一個主菜同埋有咖啡或茶！今日我哋就試咗香煎鱸魚同埋海鮮海膽醬意粉！南瓜湯係好有水準㗎好香濃好甜仲有啲南瓜子喺上邊反而個沙律就遜色咗少少！青蘋果秋葵沙律中青蘋果就實在太薄片太少喇！整體都係新鮮嘅咁但係我會建議揀湯！主菜就都係最鍾意煎鱸魚配薯菜，佢嗰個蕃茄汁呢唔識點樣形容係好好味⋯⋯用咗好多種唔同嘅蕃茄煮！雜菜係多到呢個份量係非常之滿足而且嗰幾舊薯角都好好食你睇相就知㗎啦反而個海鮮海膽汁意粉就麻麻哋！佢用料都OK嘅！海鮮意粉都有兩件青口、魷魚圈、兩粒大蝦、有一粒帶子，比起有好多餐廳話係海鮮大其實啲海鮮係唔知去咗邊！但係個人口味覺得個海膽汁唔係太合口味，唔知係咪啲海膽唔太新鮮啦⋯⋯之後咖啡呢度係出名嘅！但係如果要加$30先至有latte就好似唔抵啦咁都係叫咗普通跟餐嘅Americano！但係優點係咖啡都有兩種口味可以選擇，一種係比較酸味花香啲，另外一種係濃味少少帶朱古力果仁味！咁兩樣都試咗，我就自己比較鍾意係帶果仁味呀多啲