Green Common (如心廣場二期) (Closed)

Green Common主打素食/新肉類，喺香港擴展迅速，並喺中環開左旗艦店。今日喺荃灣行街咁啱遇上佢哋分店，特意入內一試。當日係晚膳時間，但無需等位即可入內，而餐廳只有約六成半座位有人。餐廳裝潢看似新式冰室，菜單則有沙律同偏港式風格嘅菜式。是次我哋叫左和風藜麥沙律配柚子汁，以及芝脆焗豬扒飯。藜麥沙律份量好多，一般食量嘅人可以當主食咁食，配上柚子汁非常清新。焗豬扒飯用上新豬肉，扒上比普通豬扒薄，質感上可食出分別，但個人覺得味道有原豬扒嘅七八成。豬扒飯美味之餘，食落亦無一般焗豬嘅滯脹感。Green Common性價比非常高，想試素食/新肉類，最後埋單每人只需七八十蚊，值得再次添食。