Texas Burger (Closed)

難得表弟喺加拿大返嚟，當然想搵個好地方同佢chill一chill。Texas burger 位於朗豪坊12樓，旁邊就係商場嘅落地玻璃，所以整個環境非常開揚，隔離仲有live Band表演，臨近聖誕節可謂充滿氣氛。我叫左軟殼蟹牛油果牛肉漢堡，漢堡包非常軟熟，中間有半個牛油果，中和返炸軟殼蟹嘅油膩。軟殼蟹本身亦炸得香脆。我表弟近呢一年轉左做素食者，所以比較難搵適合佢同我嘅餐廳。不過texas burger 有兩款素burger，今次表弟叫左未來素食牛肉漢堡，表弟切左少少素牛肉比我試下，學成龍話齋：「一開始我是拒絕的，你不能叫我吃，我就馬上吃。」，但食落先發覺佢嘅質感、味道，賣相同真牛肉極為相似，而且冇咗一般牛肉嘅肥膩感，食落唔會好油膩，但又唔會太乾。表弟表示非常滿意。另外，我同表弟一樣加咗$$套餐，有薯條飲品同酸青瓜。表弟叫咗可樂，而我就叫咗黑牛，即係雪糕加可樂。以前喺麥記成日飲，而家飲返非常懷念。當然texas burger用既雪糕更加creamy，更加涼透心。薯條係我最鍾意嘅厚切薯條，亦係少數快餐店能夠做到外層酥脆，內部綿密柔軟。自己身邊都有兩三個食素嘅朋友，下次一於帶佢哋過嚟食。