LAVA (Closed)

金巴利道呢邊都幾多嘢食，除咗街鋪之外樓上鋪都有好多選擇，今次就嚟呢間樓上嘅西餐廳 食我好鍾意食嘅西班牙菜。環境好大好闊落，而且一入到去就有一個超大嘅酒吧，昏暗嘅環境好適合約會！《蟹肉奄列》$98蟹肉同蛋係一個絕配，基本上係必食。蛋超厚，包住好多新鮮嘅蟹肉，好滿足！《西班牙豬牛迷你漢堡包》$88迷你漢堡包啱晒啲比較細食嘅人士，雖然份量唔大但係非常精緻，中間仲有吹卜卜嘅物體，好脆口口感好好，而且牛肉豬肉咬落都彈牙，整體來講口感好好。《馬薩拉炸雞髀仔》$88呢個雞髀仔炸得非常香脆，但係食落唔會好乾，仲係充滿肉汁！點埋薄荷醬食就啱啱好，少少清新嘅感覺，增加個層次。《螺絲意粉》$138羅勒醬係我其中一款好鍾意嘅意粉醬，呢個意粉食到好濃郁嘅羅勒味道，而且仲有唔少嘅蔬菜混合左喺入面，好味得來又非常健康。螺絲粉煮得啱啱好，唔會好林，口感真係幾好。最後就到甜品！我哋嗌咗西班牙油炸鬼波配朱古力雪糕，油炸鬼外脆內軟，唔會好厚粉，配埋朱古力雪糕真係好好味。