Cafe Addict (Closed)

一個人想享受下me time，首選一定係cafe，靜得黎又有d氣氛。今日去左佐敦嘅Cafe Addict享受me time。位置就喺佐敦港鐵站附近，非常就腳。餐廳樓底高，用左大量黑調雲石設計，非常簡潔而型格。入座後睇好想食咩就出去落單，水就自助式。我就叫左個玉子燒早餐同一個甜品連飲品set。玉子燒早餐豐富，有日本蛋製玉子燒，南瓜薯餅，香草豬肉腸，雜菌，沙律菜，車厘茄，酸種麵包。配上日本柚子醋。仲可以加錢轉配其他食物。All day breakfast 配玉子燒真係第一次遇上，玉子燒一層層厚度一致，咬起黎好香蛋味，仲有d半熟蛋液食落好滑，好有誠意。南瓜薯餅超好食，食落仲有d辣口，表面香脆但唔油膩，裏面嘅南瓜蓉帶清甜，非常綿密。香草豬肉腸煎香，有肉粒咬口，唔會太鹹。雜菌用黑椒調味，食落香口。沙律菜都幾新鮮，柚子醋比想像中酸，配沙律菜開胃清新。酸種麵包軟熟帶微微酸味。甜品叫左香桃芝士蛋糕，面頭係桃肉啫喱，酸酸甜甜，芝士蛋糕幼滑，一人份量剛好，幾好食。Iced Latte咖啡味香濃厚身。今次Me Time非常滿足，喜歡坐下cafe嘅朋友可以去試下~