京都一の傳

日本真係永遠一個去唔厭嘅地方，喺香港隔兩三個月就已經好掛住日本，喺尖沙咀海港城行街無意中發現到一間好有日本感覺嘅餐廳，環境超舒服，壽喜鍋價錢亦好合理，二人份量$800有找。帶埋小朋友一齊出去食，只係叫多咗兩份小食三個人都食得好滿足。炸蝦天婦羅新鮮炸起，估唔到有五隻大蝦咁多，燒牛舌亦都非常入味，厚切嘅牛舌好有口感，好好味。套餐我哋叫咗雞白湯，雞湯非常濃郁，而且好有雞味，未開始食嘢之前先飲兩碗，正啊！套餐有齊有豚肉同牛肉，連肉丸全部質素都好高，牛肉見到油脂分布平均，已經知道一定好味，但估唔到豚肉非常有驚喜，一啲都唔韌，而且好有豬味。最後套餐仲有大量蔬菜，同埋烏冬，最後仲有濃郁嘅綠茶雪糕，如果兩個人食真係好飽，今餐真係非常滿足。