Fleur (翩滙坊) (Closed)

留意咗呢間以食用花為主題嘅澳洲菜餐廳一段時間，但好少去荃灣所以一直未有機會試。最近先發現將軍澳都開咗分店，為咗避開人潮所以揀喺三點前嚟到，就算weekend都唔使排隊。餐廳面積都幾大，位置都算多，店內擺咗好多觀葉植物跟休閒風格裝潢好配搭。兩個人點咗一份pancake，一件蛋糕同兩杯飲品。首先上枱嘅係Flat White同Velvet Latte，粉紅色嘅Velvet Latte好可愛，飲落無乜紅菜頭陣泥味，平時唔食紅菜頭嘅我都接受到，估唔到味道唔錯。毛冷球蛋糕賣相非常可愛，像真度高！一共有四個顔色四個口味選擇，我揀咗淺粉紅色係番石榴味。Mousse蛋糕細滑，番石榴味清新又自然，而且甜度低，適合食得健康嘅人。為咗呢個花花pancake而嚟，果然無令人失望。表面鋪滿食用花同生果，賣相好吸引。pancake鬆軟唔會太乾而且蛋味濃郁，底層藍莓醬令味道更豐富。配埋面頭嘅Mascarpone cream好好味而且份量大，兩個人share都夠。總括嚟講食物質素唔錯，除咗賣相滿分味道都好餐廳環境都唔錯，枱同枱之間有適當距離，坐得舒服。下次會再嚟幫襯，試下其他菜式。