極尚大喜屋 (鱷魚恤中心)

Open Now

Now Closed

坊間日式放題選擇都有唔少，作為榴槤控嘅我知道位於觀塘嘅極尚大喜屋做緊榴槤任食放題，專登約咗同道中人一齊試吓先。餐廳除咗平時主打嘅日式放題外，呢個榴槤放題都十分有誠意，首先自助區入面有提供榴槤蓉，有個時間表，定時定候就會refill，分量相當之多，真係任食唔嬲。烤金枕頭榴槤絕對係必食推介，烤咗嘅榴槤味道更加香，鍾意食榴槤嘅朋友千祈唔好錯過。其他各榴槤食品，例如榴槤芝士撻同埋榴槤大福質素亦唔錯，一個放題滿足晒食日本野同食榴槤兩個願望。自助區仲有榴槤咖啡提供，呢個榴槤放題都算俾足誠意，夠晒徹底。除咗榴槤之外，餐廳當然提供主打嘅日式食品，例如刺身、卷物、燒物等。海鮮選擇亦相當之多，包括有鮑魚、蠔、帶子、花膠等等。另外要讚一讚餐廳上菜同執枱速度快，絕對唔會阻住你喪食喪飲。飲品除咗有汽水茶類之外，仲有酒精飲品提供，見有唔少清酒供應，選擇多元化。