同人鍋 (Closed)

同一班好友聚會，各人口味不同，食火鍋就最 fit，大家都可以食到自己想食嘅嘢。因為朋友唔食得辣，所以叫咗個唔辣嘅雞煲，雞肉仲 keep 到好嫩滑，配埋爆得好香嘅洋蔥，唔錯。食完雞煲會換另一煲湯打邊爐，一次過試晒唔同風味嘅食法，正合我心意。我哋揀咗花膠湯，未落火鍋配料前飲咗碗，個湯有花膠，秋冬食啱晒，好鮮呀! 海鮮拼盤有鮑魚、海虎蝦、花甲、魷魚、花枝片、韓國蠔、蟹棒、藍青口同鑽石蜆，日本蠔就食得多，韓國蠔就第1次食，原來食落都幾鮮，鑽石蜆好少見，呢度竟然有，食落好鮮甜呀! 紫薯水晶包好特別，就咁放落去由佢淥，外皮變咗透明就食得，仲要紫薯好味又有益，正! 粟米好甜，係打邊爐最喜愛嘅蔬菜之一。朋友話打邊爐就一定要食午餐肉，食落又幾夾喎。黑豚肉肥瘦適中，肉味好濃。帶子鮮味，白鱔片爽脆。生根吸湯又煙煙韌韌，口感好好。響鈴浸落去就即刻夾返上嚟，吸盡湯汁又保留少少鬆脆口感，每次食火鍋必叫。蔬菜都新鮮，解吓油膩感。雪櫃嘅飲品係自助任取。食物同飲品都係任食任叫，唔驚朋友話唔夠飽，同時可以試齊唔同食品，真係食得好盡興。