One More Hotpot 來一鍋 (Closed)

本人係海鮮控亦又係火鍋愛好者，加上之前係網上已經見到來一鍋既海鮮拼盤好吸引架啦，任飲任飲都係＄368，決定要黎試試佢～上到去首先環境乾淨，比起其他任食打邊爐坐得舒服好多，店鋪仲有圍裙提供，好細心。我地2個人食，揀左花膠螺頭雞湯（濃湯），岩哂女仔食呀，打邊爐仲可以美顏！我地叫左海鮮拼盤，有大蝦、扇貝、貴妃蚌、象拔蚌、青口、鮑魚。 正呀～ 任飲任食黎講配料都算多選擇，當然有D靚牛肉係要加錢啦～另外會有埋一D手工餃同手工丸，聽講係駐店師傅手打架！口感彈牙，必食推介之一！野飲都係平時放題有既汽水，最正係佢啤酒、紅酒白酒都任飲，下次可以同成班朋友黎啦～～～食到中段，可以試下湯底入面既花膠同螺頭了。 螺頭吸收左湯底既鮮味，但又唔會好似𡁻香口膠咁咬唔爛～ 花膠都真係超足料，食極都仲有呀，哈哈。食完仲有甜品心太軟，呢個要等15分鐘左右，本身對任食火鍋店既甜品冇乜太大期望，但反而有驚喜喎，入面朱古力醬真係有流心，好似平時出去甜品鋪既心太軟一樣，唔錯。