肉搏食堂 (Closed)

我同朋友都幾鍾意去厚福街搵食，今日就揀咗去呢間食丼飯嘅肉搏食堂。呢度主力就係做丼飯，有刺身丼亦有熟食肉類嘅丼飯選擇。平時我比較鍾意食刺身丼，不過今日天氣寒冷，所以想轉一轉口味，就揀咗慢煮黑豚盛丼。呢個黑豚丼分別有150g同200g選擇，我就揀咗細size，其實份量都唔少。以慢煮方式製作豚肉令肉質非常嫩滑可口，上面淋上芝麻醬，加上雞蛋，再灑上蔥花，真係色香味俱全。而入面嘅飯亦淋上另一款醬汁，由外至內都咁豐富。另外我哋仲揀咗慢煮頂級牛肉盛丼，因為太鍾意食牛肉，所以呢個丼就揀咗200g。牛肉呈半熟狀態，配上牛肉醬汁，同樣地加有雞蛋，混合夾配嘅忌廉芝士，非常鮮味。另外揀咗日式豚肉餃子作小食，餃子屬於自家製，煎得金黃色食落夠甘香。飲品非常打卡able，藍莓青檸梳打呈深紫色，上面插上小花，睇落迷幻而味道清新。紫薯鮮奶嘅漸變紫色非常吸睛，而且仲啖啖帶有紫薯香味，越飲越開心覺得甜絲絲。