財記辣蟹私房菜

Open Now

Now Closed

財記前身其實係老牌小炒店越華會，早前越華會因為疫情而結業，財記嘅總廚就鋪位連原班手足一齊接手，有心人係值得支持下嘅。茶錢$10/位，花生$20/碟。財記出名食海鮮，所以海鮮種類除左多之外，每款海鮮都有幾款整法揀，另外豬牛雞、蔬菜、煲、湯同飯麵選擇都一樣多，除左海鮮大部份都係時價之外，其他菜式都係一百幾十就有交易。脆皮炸豆腐($78) - 炸豆腐比平時食倒嘅大粒，份量都好多，豆腐炸皮夠脆食落仲係脆脆地，豆腐熱辣辣，椒鹽味都夠，個人覺得就算唔蘸甜辣醬食都好食。鮮奶蛋白蝦球($148) - 蝦球好大隻，肉質扎實，仲有八隻咁多，鮮奶蛋白好滑唔會太熟，性價比非常高。椒鹽排骨($95) - 排骨份量一樣咁多，排骨外面夠乾身唔會太油，但中間肉質仲保持軟嫩，夠晒椒鹽味非常惹味。京蔥醬爆牛肉($98) - 牛肉量都幾多同幾大塊，牛肉軟嫩，惹味得黎唔會太鹹。鹹魚粒炒芥蘭($88) - 芥蘭冇渣冇苦澀味，食落幾脆口，鹹魚雖然唔多，但鹹鹹香香幾好食。總結，小菜好夠鑊氣，惹味得黎食完又唔會覺得口渴，碟頭比出面大份，性價比高。