LeeLaksa

Open Now

Now Closed

又到咗一月一度嘅月經飯時間，為咗方便呢位媽媽朋友可以快啲返屋企，我哋都係揀返喺公司附近嘅餐廳。今晚就試吓馬拉菜，平時行過都見到好多人嚟買外賣，應該都唔錯。我哋叫咗個串燒拼盤，原本個拼盤應該係有三款嘢食，包括魷魚鬚雞肉同埋蝦，但係因為魷魚鬚已經賣晒，所以變咗蝦同埋雞肉每樣兩串，佢嘅份量比我想像中大好多，串燒本身辣辣地，都真係好惹味。然後我哋原本想叫椰菜苗，不過又係賣晒職員就介紹我哋可以食佢哋嘅通菜。我哋揀咗蝦醬高炒通菜。佢個菜都好爽口，如果蝦醬都唔會太鹹，味道啱啱好。最後就叫咗個炒貴刁，呢個貴刁好得意除咗河粉之外，仲有一啲麵撈埋一齊炒，上面有蝦仁，都係辣辣地，同樣地份量都比我想像中大，其實我哋兩個人都食唔晒。而令我覺得最特別嘅係佢中間會有臘腸，甜甜地同個辣味中和返，味道都幾特別。