炊豕店 (曉悅) (Closed)

長沙灣有咩好食? 上網openrice查一查，見到呢間都幾多人讚👍👍👍，而且食物圖片好吸引，就即管嚟呢間“炊豕店”試一下。門口裝修簡潔，好有日本feel，一行入去，侍應就殷勤招待，安排我們座位。而每枱都有一張落單紙，鐘意邊樣，就叫邊樣，非常簡單快捷。嚟到呢間鋪，梗係要試下依度最出名嘅“蔥油豬扒飯”。炸豬扒大大件，份量十足，仲有鋪滿喺面嘅薑蔥油，用嚟撈飯，簡直一流 。碗側邊仲有放左小棠菜 。食落就唔會覺得太膩啦！仲有飯底粒粒脹卜卜 ，好似珍珠米咁，食落煙煙靭靭，真係好好味。呢度仲有一個特色，就喺可以叫“少飯”，仲可以減兩蚊添。我諗一般女仔，都應該要少飯，因為每碗飯都超大份量，真係好多飯。叫左少飯，女士就唔怕食唔晒，浪費食物啦，認真環保！我仲跟餐加十蚊，叫咗塊超級厚切午餐肉，望見都流口水。。。😍😍😍嘢飲都好多元化，汽水，豆漿，果汁都有選擇，我跟餐加10蚊，叫咗支豆漿。如果你要飲管，可以同侍應講。仲有，我見到d鹵水豬大腸，雞蛋，雞翼，雞腎，豬珥，好似好正咁，下次真係要試吓至得。今日，實在太飽啦！🤩🤩🤩食飽後，大滿足，捧住個肚走！👋👋👋