BEL CIBO Seafood Bar & Restaurant (Closed)

今日同朋友慶祝生日，所以一早就揾咗間靚餐廳，諗住食餐好！餐廳環境偏向時代感，純白色既椅墊比人一種簡潔舒適嘅感覺，水晶吊燈就係一個小小嘅點綴，提升華麗感，咁我同朋友就可以係舒服嘅環境一路食一路傾下計。今次同朋友決定咗食二人套餐，可以嘗試較多菜式。而三款頭盤都具特色，當中香煎法國鵝肝伴焦糖菠蘿，以鮮甜嘅菠蘿降低鵝肝嘅油膩度，兩者互相配合，所以食落都唔會有好漏嘅感覺。另外，菠蘿仲伴咗焦糖微煎，煎香嘅表面散發濃濃嘅菠蘿香味，甜度偏甜。而秘製鮮凍鮑魚，鮑魚爽口彈牙，雖然鮑魚係凍上，但配合咗忌廉汁嘅調味，仍然保持鮮甜。泥到主菜方面，主菜嘅美國安格斯肉眼扒果然冇令人失望，我選擇咗七成熟，烹調程度啱啱好，肉扒分量充足，大大份脂肪比例適中，唔會過分肥膩，而濃郁嘅肉汁仍然保留得好好，食落好juicy! 調味方面，餐廳仲附上海鹽同燒汁兩款，任君選擇。生日又點少得一個靚甜品呢，今次就點咗一個沙巴翁黑炭球。甜品一上嘅時候，朋友仲誤以為佢只係一個普通嘅心太軟，但佢咁諗就錯啦！其實佢係由一個外面係朱古力雪糕，入面係雲呢拿雪糕嘅組合，配搭特別。