富臨漁港 (Closed)

印象中寫過三十幾篇食評都冇比過負評，但呢間真係不得了，話說去完朋友屋企玩，諗住一班人去打邊爐吹下水咁，就搵到觀塘有呢間富臨，有得任食，上到去隔離仲有一間茶樓，隔離姐姐勁好招呼叫我地入去，但因為我地見呢到有墨魚仔，所以就衝左入去，點知就係伏嘅開始！首先飲品選擇小到喊，得百事可樂同埋7 喜，美蓮達同埋一喳喳淡到好似水咁嘅酸梅湯！跟住拎醬料嘅地方勁污糟勁多嘢「嬲」，佢加埋先得六樣揀，就係豉油沙嗲醬辣椒蒜蓉蔥嗰啲咁，啲蔥同蒜蓉仲要好似冇切過咁，全部勁大粒！叫咗豬骨湯底，淡過水，食到一半我哋忍唔住出去拎啲沙嗲醬倒落個湯底度先覺得正常返少少！食物方面，鵝腸苦嘅，牛柏葉完全冇味道，為咗墨魚仔入嚟但叫極都唔嚟，其實佢直接同我地講話無仲無咁嬲，芝士腸同啲丸好正常，我哋一路食一路讚芝士腸同丸，因為其他真係好難食，最後唯有食啲公仔麵同烏冬飽肚！成間酒樓客人唔多，員工好多，但啲員工全部都企喺度唔知做緊乜，我哋叫咗嘢食好耐都唔嚟，忍唔住催，跟住個員工入去廚房拎，一拎就拎左好多出嚟，其實即係根本已經一早執好晒，但就無人去拎，其實任飲任食打邊爐收百幾蚊都唔會要求好多，但呢間野真係比百幾都覺得蝕！