丁丁烤魚

Open Now

Now Closed

見呢間幾多好評就揀咗佢同食屋企人食飯，但係最後大家越食越黑面，埋單每位三舊，仲要唔飽。先講服務，未入餐廳門口個呀叔已經係chur我哋入去，一輪嘴係咁sell，完全冇理過客人嘅feedback，淨係不停講佢自己嗰堆台詞。樓面明顯係新手，似係一家人嚟，特別係有個後生仔，好似完全唔知呢度啲嘢點運作，我哋都未開始食已經想收走等緊水滾嘅火鍋湯底，又唔熟啲枱號，又唔熟啲菜式，十問九唔知，仲要入錯單。另一個年紀比較大嘅女員工又串到乜咁，問吓佢條魚係大定細啫，一句得埋嚟”你先至知喎”，真係叻嘅啫。剩係得一個後生女係醒目，但係可能佢太多豬隊友，所以佢全程都好躁底。講返個價錢，本身諗住叫餸嘅舖頭食物質素會好過任食果種，sorry呀，真係放題火鍋都好食過佢。嘢食份量又少，價錢又唔係平喎，質素只係超級市場買到嘅貨色(冇吹水)。最正係佢個生蠔，上到嚟係一嚿冰嚟，真係好生喎。仲有，一定要收每位$8醬料錢，唔緊要，你真係有醬料俾人揀有乜所謂啫？佢個醬料吧嘅選擇真係得辣椒，蔥，芫荽，蒜，豉油同埋麻醬，俾啲咁嘅醬料人哋，又要必定收人哋$8一位，請問憑乜嘢呀？全間餐廳唯一可取嘅地方就係啲飲品唔係好貴，完。