一茗堂 (南山商場) (Closed)

休閒精美西餐@南山村去南山村除咗打卡之外，依道都幾多好嘢食㗎。今次就去咗依間新開西餐廳醫下個肚，環境都幾開揚，而且價錢唔貴，一於試下新嘢，自製一點本地旅行渡假 feel～Weekend 同樣有Lunch Set，我哋點咗兩個套餐同埋時令蔬菜。午餐送是日手打餐湯或者田園沙律，我哋就各揀咗餐湯同沙律。田園沙律嘅份量都唔少，salad dressing 係黑醋汁唔肥膩，啲沙律菜都好清爽。餐湯係番茄忌廉湯，酸甜開胃，質地夠晒creamy。香煎帆立貝墨魚汁意大利粉四邊用車厘茄點綴得好靚，帆立貝幾大隻鮮甜，意粉亦煮得相當有水準。味道濃郁嘅墨魚汁充分包住意粉，每一條都烏卒卒，食落好惹味！ 焦邊荷包蛋堪稱完美啊，令招牌雞扒煎蛋配白飯嘅賣相大加分。厚身雞扒十分重量級呢，雞皮帶少少香脆口感，好好食又啱哂送飯。另外點咗蒜蓉白酒炒雜菌，蒜蓉味好香好濃，簡簡單單但意料之外咁好味！甜品叫咗個法式啤梨焗撻加雲呢拿雪糕，個撻瀰漫住新鮮焗起嗰種餅香。梨肉清甜，熱騰騰嘅啤梨撻配透心涼嘅雲呢拿雪糕，實在係依個周末嘅小確幸。