味千拉麵 (第一城中心) (Closed)

住石門行去第一城其實好近，突然興起過去食嘢，原先諗住食吓炸雞，行過見到味千拉麵，原來同太座都未食過，好，今晚入去一試!睇吓餐牌價錢又唔係好貴，一心以為平D冇人地咁好食啦，飲咗啖湯底已經知道咁諗係錯，湯底夠料!“味千之霸”睇個名就知係招牌之一，對於我呢D第一次嚟食嘅當然係首選，豬軟骨鬆軟入味，好骨膠原feel，流心蛋有蛋味，叉燒入口即溶，瘦肉部份唔鞋，但總覺得日本所講嘅叉燒唔夠廣東叉燒咁正，哈哈!“赤火戀”係全場唯一辣嘅拉麵，至啱太座，但佢話好味不過唔夠辣，可以再辣D!“味千餃子”上枱熱騰騰，肉汁ok，唔錯!“ShakeShake薯條”估唔到咁出色，叫咗海苔味，唔食薯條嘅我都食咗大半，一定要試!埋單見到好多外賣用foodpanda，職員話做緊買滿100減30嘅優惠，嘩!下次我都叫foodpanda送嚟屋企喇!