饗樂町 (Closed)

行過彌敦道，平時沿路兩邊都係啲連鎖餐廳，或者係一啲貴價，但係唔好食嘅餐廳。琴晚行過見到呢間出邊個餐牌幾吸引，入邊又坐得舒舒服服，所以就毫不猶豫咁入咗去。本身都冇咩期望，但係見到佢餐牌啲嘢好多選擇，圖片亦都係好似好好食。同我女朋友一人叫咗一個餐，我叫咗個軟殼蟹天婦羅烏冬，佢仲會送麵豉湯同埋前菜，如果加嘢飲的話就可以半價換購。食物個軟殼蟹天婦羅係原隻，非常之抌本，而食物嚟到嘅時候個天婦羅應該係啱啱炸好，所以好新鮮好脆。個軟殼蟹好有口感，平時出去食日本餐廳都好少會比原隻，而佢呢一個烏冬亦只係$68 ，真係抵到爛。除咗個軟殼蟹之外，佢仲有兩隻蝦嘅天婦羅，同埋其他配菜嘅天婦羅，嗰啲都好好食。唯一美中不足就係個烏冬份量有啲細，所以建議如果男士去食的話可以叫飯，咁就應該會夠飽啦。