豆公館

Open Now

Now Closed

經過旺角見到有間門口係落地玻璃嘅食店，原來係豆類製品嘅荳品店，裝修以木係為主，感覺都幾新潮，另外開放式廚房可以見到店員炒麵同煎豆腐嘅模樣，環境好舒服，枱與枱之間都有距離，唔會話太迫。✨招牌麻婆腐皮蛋餅蛋餅就試得多，但係加埋麻婆醬真係第一次試，首先蛋餅口感柔軟香滑，麻醬更係獨家自製，夠晒過癮。✨原味豆漿&無糖淡豆漿（熱）原味豆漿唔係太甜，好飲。無糖淡豆漿，雖然係無糖，但係好有豆香味，飲一杯真係唔夠喉。✨滷水豆卜&魚肉煎豆腐豆卜完全滲入滷水汁有少少甜甜地，食落帶有台灣嘅風味。魚肉豆腐就煎得好香，豆腐外脆內暖，不過油就多咗D。✨老乾媽炒麵 & 炒米粉老乾媽炒麵食落鹹鹹辣辣，呢個配搭都唔錯。炒米粉雖然配搭普通蔬菜，但食落好有鑊氣，兩樣比較，個人反而鍾意食炒米粉多啲。另外太肚餓嘅話可以叫特盛份量，呢個位又幾細心。✨黑芝麻豆腐花豆腐花好滑，好有豆味，上面仲要鋪滿黑白芝麻，成件事加分。另外要讚一讚店員都好Nice，而且荳品款式好多選擇，令我覺得唔使飛去台灣就可以喺香港食到美味嘅早餐店，仲要喺旺角咁方便。