甄記廚房 (Closed)

近七八年都近唔中會去鰂魚涌食飯，因為總公司喺太古坊。老實講附近咁多寫字樓，搵食真係艱難，亦都唔係咁多好嘢食。前排朋友仔話發現有間餐廳仔啲龍蝦湯飯好好食，鍾意龍蝦湯嘅我一直都想去試，但係一直冇機會。直至尋日過開灣仔開工，於是過去鰂魚涌搵埋朋友仔一齊食。點知去到冇得食，因為得星期一至四至有，星期六得雞湯飯。不過既然去到，點都要食一食，雞湯就雞湯。個湯我略嫌甜咗少少，不過好多切雞，而且有髀有胸，好多肉，而且都好多飯，再飲埋杯華田真係飽晒。朋友仔叫咗日式咖哩牛柳粒飯，啲咖哩有少少辣，牛柳粒夠晒入味兼腍。講真間舖就唔係咁好坐，十足街坊舖又冇乜冷氣，如果唔係有人介紹我諗真係唔會走入去。不過城市中往往都有驚喜嘅。一定要搵機會試埋個龍蝦湯飯。