食嘢 (Closed)

同D friend一年見幾次面，大家都係大埔友，最鍾意喺大埔搵嘢食！最好就係地方就腳，坐得舒服唔趕客、食物好食又唔太貴啦！終於我哋搵到嚟呢間 *食嘢*！二人套餐份量大又抵食，我哋驚食唔晒所以散嗌佢仲有埋甜品一條龍服務。由頭食到落尾開心傾計吹水又唔使轉塲就真係正呀！ *食嘢* 好似話一定要食豬手、咖喱，同埋估唔到有水煮牛肉食！台式飲品唔可以錯過，甜品更加係回味無窮！首先係一望見已經辣到流晒口水嘅川味水煮牛，一鍋上夠晒份量，面頭鋪滿紅油同埋辣椒，食落夠晒刺激！味蕾完全得到解放 ，牛肉分量多味道濃郁，入口尚算柔軟嫩滑。德國鹹豬手，睇賣相已經好吸引，豬手口感結實多汁，皮脆肉香。仲有我最愛嘅炸薯條，沙律菜又可以中和一下油膩感覺，整體十分喜愛。咖喱牛坑腩，贈送油酥餅兩件，油酥餅沾咖喱汁食真係夾到天衣無縫，咖喱香而不辣，牛坑腩炆煮夠火喉，入口軟腍好味道。飲品我就叫咗杯黑糖珍珠香芋奶，Q彈的黑糖珍珠有咬口，香芋奶甜度適中。甜品我要左士多啤梨冰再加配料，蜂蜜牛奶雪糕真係好味到不得了！士多啤梨生果好香甜，呢度嘅芋圓好有台灣味道。我估計好快就會成為我哋大埔友聚腳嘅飯堂。