海灣茶居

Open Now

Now Closed

平時返工都會經過大角咀呢間海灣茶居 ，餐廳環境寬敞，落地透明玻璃旁邊設有好多卡位，一邊嘆茶一邊欣賞下街景，比起傳統酒樓，多咗一份雅緻舒適，趁住放假約埋朋友去試下佢哋嘅下午茶。點心有好多款式，即製即蒸，全日免收加一，咁就可以嗌多幾個點心啦 。一人鴛鴦蒸飯鋪滿鮮蝦，魚肉的米飯，放喺鋪咗荷葉嘅蒸籠裏面，光睇賣相已經好吸引呀， 蝦，魚肉都好鮮甜，配合埋飯食一流 。潮州粉果晶瑩嘅粉皮包住好多馬蹄，肉碎，食落好清新。煎釀茄子茄子新鮮炸起，圓潤、飽滿、有光澤，沾上豉汁， 好惹味。 牛肉燒賣牛肉好鮮嫩，咬落仲好彈牙，比起酒樓嘅牛肉球好食得多。鮮竹卷熱辣辣腐皮包住豐富嘅餡料，味道鮮甜。最後仲嗌咗我最鍾意食嘅雙皮奶，桂花糕，糖不甩，可能係因為即叫即蒸嘅關係啦， 所有甜品都好好食， 糖不甩仲超彈牙。