犢食 (Closed)

放工唔想煮飯，就去咗呢間喺網上都幾出名嘅黃店食個dinner。佢係喺觀塘嘅工廠大廈入面，比較隱世；而佢係一間日式嘅餐廳，我個人真係好中意食日式便當，所以對佢期望都幾高。入到去佢牆上貼咗好多文宣，仲有啲文宣貼紙同名信片可以俾人攞走，又有唔同嘅嘢寄賣，好值得支持。大阪燒牛肉丼 $68 佢係牛丼上面加咗個大阪燒汁、沙律醬同大量鰹魚碎；佢牛丼嘅牛煮得好淋好入味，洋蔥索晒啲汁好甜好好味，就咁食已經好好味！加埋大阪燒令佢成個牛丼層次同口感多咗，兩樣加埋好夾！白飯方面，佢用咗珍珠米，軟硬適中，同時佢吸收咗肉汁令佢更好食！柚子與大根 $16柚子大根爽脆、清甜，食落開胃、解膩，好食！關東煮(雞肉丸子+雞蛋) $16關東煮個湯鹹鹹哋但唔會太濃，雞肉丸子係煎香再煮，肉質紮實又多肉汁；雞蛋就係用日本蛋，煮完吸晒湯汁，唔錯！玄米茶跟餐送熱玄米茶，清清地又有玄米咬下，好飲！今次食嘅幾樣嘢都好高水準，以佢價錢嚟講真係唔錯！佢仲有唔同款式嘅飯同咖哩，同有好多小食，下次一定要再試下。