新發記腸粉粥品

Open Now

Now Closed

同事唔係好舒服，於是今日午餐就決定食粥。唔知道灣仔邊度有粥店，唯有上網查，先知原來灣仔道呢條旺街都有一間。跟住地址搵，我好驚訝原來佢就係喺平日食開嘅餃子店隔離！真係一直都「視而不見」！裝潢非常之簡單，但店入面都叫企理。招牌同餐牌都係黃tone，大街上真係唔係好起眼！因為未食過，於是就穩陣啲叫咗皮蛋瘦肉粥。店員呀姐都好友善，佢問我駛唔駛要餐具，我心想問得都可能要加錢，所以就話唔駛。等待期間，我見到店入面有打工仔又有學生哥，原來堂食係有瓦煲上，睇落好有風味又有屋企嘅感覺。皮蛋瘦肉粥都幾大碗，$29再加一蚊外賣費。入面超多皮蛋同蔥，又唔會水汪汪，好正！瘦肉就咸咸地，都幾開胃。手寫餐牌好整齊，下次有機會一定會試下堂食同埋試下腸粉。