韓兄弟燒烤

Open Now

Now Closed

同A姐去完韓國，黃昏落機返香港，好想食荳腐火腩飯呀，但想要問吓A姐想食咩先？點估都估唔到，食咗8日韓菜，佢返到嚟仲係想食韓國燒烤！早知一早就唔問佢啦，嘅然洗濕咗個頭，咁一於搵間地道嘅韓菜啦。今日我哋去到紅磡嘅韓兄弟燒烤，入到去嘅感覺讓我覺得好似去返落機前嘅韓國一樣，電視播住K-pop，又係由韓國人打理，啲韓文字又飛晒出嚟喇。有六款泡菜：醃蘿蔔、醃青瓜、韓式泡菜、大豆芽、薯仔、菜，款款都新鮮爽甜，酸酸辣辣夠晒開胃。套餐內有5塊特級豬頸肉、1大塊梅頭、2大舊五花肉！店員仲會送上蛋漿、芝士同粟米，可以整爐邊蛋。由韓國店員親自幫我哋燒，火喉啱啱好呀！五花肉嘅脂肪比例均勻，燒完非常香口，肉味香濃，好惹味。特級豬頸肉好肥美呀！燒到脆卜卜嘅豬頸肉，金黃香脆，肉質彈牙，好好味呀。厚切嘅梅頭肉，大塊得嚟又唔韌，肉味非常香濃，好有口感呀。醃過嘅原隻八爪魚，大大隻，好新鮮爽口，最緊要係辣得好過隱呀！最後食埋呢個罪惡嘅化身，啲芝士可以拉絲架！