台灣麵

Open Now

Now Closed

終於買完年貨，正在愁唔知道一個人要食乜嘢嘅時候，咁啱就俾我睇到呢間台灣麵。喺出邊望吓個餐牌，有獨食套餐，再上OpenRice睇睇，食評都似乎唔錯，咁啱餐廳又有位，於是就入去試吓囉。間餐廳係數碼落單嘅，研究咗一輪，決定個獨食套餐要個酸辣湯、紅燒牛肉同滷肉飯，至於個飲品就要咗個熱檸水。間餐廳其實都幾大間，亦非常旺場。等緊嘅時候，睇吓墊枱紙上其他嘅介紹，諗緊如果下一次再嚟，應該食啲乜嘢嘢😅。最先上嘅係酸辣湯，我係一個好喜歡飲酸辣湯嘅人，喺香港亦都飲過唔少酸辣湯，貴嘅平嘅都有。呢一碗酸辣湯雖然唔係話最好味，但係味道調較得幾ok，酸同辣嘅平衡做得啱啱好，豆腐絲同木耳絲等料都落足。再上嘅係紅燒牛肉同滷肉飯。嘩，碗飯真係大碗囉，我諗我老公都未必食得晒。碟紅燒牛肉一共有四大塊，啲肉炆得十分之腍，鹹味適中，非常可口。碗飯上面的滷肉甚多，撈埋啲飯一齊食令人十分開胃。尼個餐只係收$80，點都諗唔到佢嘅份量竟然有咁多，CP值真係夠高。杯熱檸水俾嘅檸檬都算多，唔似一啲餐廳俾嗰一、兩片，連檸檬味都飲唔到。呢間餐廳「掂」，一定會有下次👍！