麵道 (Closed)

成日都講，食日本料理簡單如一碗拉麵，都要着重上枱碗麵個賣相。呢間鋪頭好耐之前聽朋友講過話都幾好食，就嚟試一試，點知未食先失望！其實我都已經唔係食啲乜嘢特別嘢，只係叫返一碗最簡單嘅豚骨湯叉燒拉麵，佢仲話有伊勢海老，即係龍蝦添！點知一上枱，已經發覺唔對路，點解同餐牌幅相爭咁遠嘅？？？最起碼啲叉燒係完全冇火炙過嘅跡象！！我本來一心見到幅相啲叉燒火炙得咁靚先至叫㗎嘛，咁即係貨不對辦啦，咁有冇構成違反商品說明條例先？就算你灑滿晒芝麻都冇用架，唔會令到塊叉燒變返香口個喎！叉燒咬落平平無奇，只係一塊普普通通嘅薄切腩肉！所謂嘅伊勢海老豚骨湯，我真心食唔到有半點嘅龍蝦味！至於拉麵嘅質地中規中矩吧，軟硬都尚算適中。最後嘅安慰就只係得返嗰隻味附玉子溏心蛋，還叫做可以。收緊$90一碗拉麵只係得呢啲質素，真係唔會黎食第二次，質素更好嘅有大把選擇！