燒肉酒場 (Closed)

Weekend同朋友食燒肉放肆一番，搵到呢間主打羊肉同和牛嘅成吉思汗燒肉店，裝橫一貫日式居酒屋風格，燒肉，料理，炸物，燒酌一應俱全。每枱都有放滿爐邊嘅烤雜菜，有椰菜，洋蔥，冬菇，韮菜，非常新鮮爽甜，烤香後特別可口。桂花烏龍水果茶$68，桂花烏龍配水果香甜，冰凍茶香，配燒肉一流。和牛盛合 $468 可以1次過食到5款和牛，有西冷，肉眼，背峰，牛肩肉，三角胸小排，最深印象係三角胸小排，口感特別鬆化，油脂感重，背峰肉質比較有咬口，肉味較濃。配上月見醬油，令牛肉更加香滑。羊頸柳$128，另一主打成吉思汗燒羊肉，羊肉好新鮮，有羊味但唔會羶，配成吉思汗調味粉，帶有孜然，辣椒同炸蒜香味，非常滋味。日本原隻燒魷魚 $128，魷魚好大隻，燒出香味之後剪開享用，肉質好彈牙，夠厚身，而且好鮮味，juicy。原隻鮑魚 $176/2隻，鮑魚肉質彈牙鮮味, 燒過後鮮味更出。石鍋泡菜牛肉飯$98, 熱辣辣上枱，配料好多，拌飯醬帶辣勁又好香，飯焦夠脆火喉剛剛好。有靚肉有多菜，選擇多，係性價比高的日式燒肉店。