了不起 (Closed)

之前喺油麻地見過呢間飲料舖，我仲以為又係開到周圍都係嗰種，但後尾先知原來全港得兩間。另一間就係香港大學店，但實際位置其實係石塘咀🤭。年初三喺西環行大運期間就見到了不起有開，仲有唔少人買緊喎，我又買先。我唔知有乜係出名㗎，就求其啦，主要想嗌杯廿蚊有交易嗰啲😜。了不起提供嘅飲料類別有：原味茶、調味茶、拿鐵類(鮮奶茶)、鮮水果茶、奶蓋茶同冷泡茶🥤。價錢由$12-$32不等，平均價$2x，都合理。另外，甜度同冰度都有得揀。我呢日試咗凍珍珠四季春拿鐵($20)，微糖微冰。個杯係密封的，見唔到入面🙈，但飲落都ok嘅，正正常常，可能奶茶會好飲啲。另外，啲珍珠有少少驚喜，因為都幾好咬口，而且係白玉珍珠😚。我幾欣賞呢間飲料舖嘅杯嘅設計，幾特別！啲公仔好似做京劇嘅嗰啲臉譜咁，令人印象深刻啊👹。總括嚟講，我呢日飲嘅拿鐵就普普通通、無乜特別啦，有機會都可以試下其他茶嘅。年初三店員要開工，但態度仍然都幾好👍。