喜運點心專門店 (Closed)

第一次食呢間位於石門廣場的點心店， 不時都經過呢度，呢間點心店就係喺馬鐵站對面嘅地鋪，好顯眼，同好就腳。餐廳做足防疫措施，店內亦都十分乾淨企理，雖然係坐圓凳，但枱面都算闊落。點心款式多元化，價錢都算經濟，我點左鮮蝦腸，同埋米網腸，本人喜歡腸粉，呢間既腸粉夠滑同埋好薄，配搭裏便嘅餡料，突出咗蝦嘅鮮味，米網腸亦都內脆外軟，從相中都可以見到腸粉皮係幾薄。另外。仲叫咗蝦餃拼燒賣同埋蒸粉果，蝦餃燒賣基本上都同出邊酒樓水準差唔多，不錯。粉果皮亦都好軟糯，十分足料，好飽滿，兩款點心都色香味俱全，而且上枱時熱辣辣。鳳爪排骨飯方面，排骨非常大嚿多肉，鳳爪亦都好入味，餸同飯的比例剛好。甜品方面，叫咗個南瓜煎軟餅，食嘅時候剛剛煎起，熱騰騰，表面香脆，十分有驚喜，係必食推介，仲有叫咗桑寄生蛋茶，甜度適中，女士必食補品，有中式糖水舖嘅水準。整體來說呢間點心鋪很有水準，大家路經石門可以一試。