六和素食 (Closed)

其實已經唔係第一次嚟呢間餐廳，起碼食過三次，係一間我會encore嘅素食餐廳。首先講吓餐廳嘅環境，佢係一間燈光好舒服，同埋枱同枱之間有好多空間， 非常適合一班朋友嚟傾計聚會嘅餐廳，而呢度嘅waiters亦非常Nice。而位置方面亦都好方便，就係喺銅鑼灣鵝頸橋隔離。食物方面，每次嚟到呢間餐廳必點嘅一定係咕嚕肉，同埋天香卷。咕嚕肉佢有別一般嘅素食餐廳用麵筋嚟整，因為佢裏面係用上猴頭菇，所以食落係好有咬口同埋彈牙，口感非常貼近真肉嘅。而醬汁方面亦都做到酸酸甜甜， 10分醒胃。配菜嘅菠蘿亦都係用上新鮮菠蘿而非罐頭菠蘿，所以非常鮮甜。而天香卷就係即係壽司卷，裡面包住嘅萺蓿芽食落非常清新。麻將手撕雞亦都係我非常喜歡嘅一個小食，佢嘅手撕雞應該係用豆乾切成一絲絲黎整嘅，而麻醬亦10分香濃，非常美味。而奇味豆腐係我第一次試，外脆內軟，豆腐非常亂嫩滑，外表炸得非常香脆，配合酸酸甜甜嘅醬汁，非常開胃惹味。總括而言，呢一間係色香味俱全嘅素食餐廳，唔會煮得太油膩，就算係煎炸嘅菜式亦都係口感清新。係我非常推介嘅素食餐廳。