裕鵝莊 (Closed)

冇諗過深井燒鵝喺尖沙咀開分店都一樣保持到質素。餐廳裝修環境優美，門面好光猛，喺亞士厘道都好容易搵到。佢啲小菜嘅質素都OK嘅，就好似呢個小炒王咁樣，啲腰果好脆口，魷魚韭菜嗰啲都好味。另外叫咗蜜桃冰茶同埋菠蘿冰茶，呢兩杯嘢飲都幾好飲，係一杯幾有特色嘅飲品。我唔係好識得欣賞呢個黑醋鵝肝，因為個鵝肝好粉，唔同平時喺潮州打冷舖食嗰啲咁香。重點係個燒鵝，個皮真係好好食，勁脆口，啲肉又10分嫩口，同一般酒樓嘅燒鵝簡直係差天共地。臨走之前嗌左紅豆沙同埋鮮奶桃膠，糖水都大大碗嘅，唔係話好好食，但係好過冇糖水食啦。之後連續兩日都忍唔住喺嗰度嗌咗燒鵝，最嬲尾背脊爆咗粒瘡，奉勸大家唔好食太多燒鵝，因為真係好毒，可以試吓呢度嘅其他小菜。