Cafe Paradise (砵蘭街) (Closed)

今日約咗老母去太子食飯，上一次去咗界限街間cafe paradise，今次就去咗砵蘭街嘅分店，其實兩店只係一條街嘅距離。餐廳左右兩邊靠牆，環境舒適，比界限街較寛敝。砵蘭街嘅分店都有一幅牆貼滿晒即影即有相，呢個算係cafe paradise嘅其中一個特色。我同老母各叫一個set dinner。Set dinner附送餐湯同沙律。湯係牛肝菌忌廉湯，唔會太稀。我叫咗酥香軟殼蟹牛肝菌意大利飯。軟殼蟹炸成金黃色，非常香脆。意大利飯嘅口感非常好，煙煙韌韌，調味亦恰到好處。老母就叫咗烤焗西班牙黑毛豬肋排，擺盤好似一幅藝術品。豬肋扒非常大件，肉質鬆軟，配上旁邊嘅翠玉瓜、薯蓉、燒菠蘿，份量非常足夠。Set dinner加$15就有特飲。我當然唔執輸，叫咗杯凍薄荷朱古力，薄荷味非常清新，加上朱古力甜度適中，而且夠晒大杯，抵飲！老母就叫左洛神花茶，非常寫意。最後仲有豆腐雪糕食！