千色車仔麵

Open Now

Now Closed

經過見咁多人幫襯，雖然地方窄咗D，但見佢都光猛企理，諗住衰極有個譜，何況車仔麵都算我哋香港「名物」，一般都好少話好差，但係哩度，見識咩叫做垃圾車仔麵，絕對絕對無下次！叫咗2碗麵，1個係蘿蔔、豬腸、魷魚配米粉，另1個係紅腸、牛丸、豬皮配油麵，再加一杯豆漿，都成$50，車仔麵哩講都算貴，如果好食都無問題，但真係唔得，未食過咁渣嘅車仔麵，相信絕對唔會係個別例子，因為有幾個罪證釘佢牌。豬腸一大朕羶味，覺得佢哋清洗得唔夠；魷魚夠晒色水，但無乜味；紅腸最嚇鬼，D腸肉「腍Pat Pat」、霉霉哋咁款，仲要有D怪味，好可能係平價大陸嘢；牛丸應該最穩陣啦，點知甚重雪味；最慘情係我碗油麵，真係未試過有咁重梘水味，重到係個鼻一哄埋碗麵D梘水味已經湧上哩，食落就咁加唔使講啦！收得咁嘅價錢，仲要份量唔多，又要3餸起，真係把鬼呀！