榮園麵家 (Closed)

已幫襯依間麵檔五、六年喇，餐牌重來無變過，都只得魚蛋、魚片、炸魚皮、雲吞、牛筋及我最愛的柱候牛腩，油菜永無選擇，只得生菜供應，全場並無任何飲品出售，要到附近的店舖買飲品。無錯，侍應叔叔們的服務係一流的串及惡，環境無冷氣，只有古式古鄉的大牛角風扇，好運的就坐係開放式的店內，只有兩張細長枱及一張細圓摺枱，運氣不好就坐巷仔坑渠邊，大排檔的格局，摺枱摺櫈、大帆布遮頭，落雨重會漏水。但要食好野，就要張就吓喇﹗主角牛筋腩：筋，膠質豐富、咽咽哽哽，滑溜溜的，好味。腩，極濃的腩汁，深啡色、很重牛香及柱候味，漿汁完全滲透入牛腩之中。腩係切件後先炆，不同潮州粉麵的清湯腩炆左先切。牛腩有啲有薄薄的脂肪，滑、有啲係坑腩，爽、有啲全瘦，軟，全都入味非常，牛肉味濃、鬆軟、有趙口，牛肉香味重，腩汁極濃。佢地用幼身的河粉，我最喜愛，因幼身的河粉能帶更多的湯及汁，又滑又棉的河粉啊。油菜，只得生菜，簡單的白烚淋上熟油加些蠔油上面，菜都很鮮嫩，我喜歡佢地烚得夠熟而軟身。我無辣不歡，依度啲辣椒油屬中辣，而且不夠香，用上太多紅椒肉喇。