Nomads (Closed)

昨日同朋友一早就去金巴利道試婚紗，試完梗係要搵嘢食醫吓個五臟廟啦，咁啱對面街有個角落位，見到啲廚師炒嘢，好奇望吓啦，原來係食蒙古自助餐，餐廳經理見我地八卦，知我地未食過，仲話請我地飲杯嘢，見佢話百幾蚊位任砌，咁就入去試吓啦。入到去餐廳，裡面充滿蒙古特色的裝修同擺設，新娘子更被毛毛櫈深深吸引住。經理請我地飲咗杯Fruit punch，略略介紹點食發，我地就走去攞嘢食。見到buffet枱，一左一右，有湯，有沙律又有水果，lunch都已經很不錯，最特別係身後嗰條長枱，上面嘅食材，即時令我諗到星洲炒米，蝦仁炒蛋，楊洲炒飯，唔好懷疑，因為佢不但有米粉，有白飯，蝦，海鮮，韭菜，芽菜，芫茜，一應俱全，仲有勁多調味料，最重要係你執好哂啲餸，有師傅幫你炒，有人送到你面前，多菜少肉，多米定少飯都可以自己決定，最後再自己整多個多菠蘿嘅夏威夷pizza，令呢個午餐劃上完美嘅句號，講真，二百蚊都唔駛嘅自助午餐，去邊度搵。食完呢餐，我地兩個滿足到爆，新娘子仲話要帶埋未來老公嚟食添。