古朴年代咖啡．酒館 (Closed)

平時最鐘意去cafe食嘢，可以悠閒咁放慢腳步。星期六去開大圍，見到都幾多人嚟呢間cafe，一行三人就入去食。呢度燈光比較暗，座位算寬敞，坐得舒服。由於唔太肚餓，我地叫左一份長通粉，小漢堡，同三杯飲品。黑松露野菌長通粉 ($68) 有豐富嘅黑松露味忌廉汁啱啱好，唔會太多或太乾，幾好味。小漢堡至少要叫三個，我地叫左安格斯牛肉($32)，車打芝士煙肉($22) 同水牛芝士蕃茄($22)。估唔到漢堡細細件，但係塊安格斯牛肉都唔細塊，而且食落有牛肉汁煮得唔乾。芝士煙肉份量都算多，有幾塊煙肉，絕對唔吝嗇。水牛芝士蕃茄不過不失。小漢堡整體唔錯，亦唔太貴值得一試。夏天太熱不得不叫杯涼快特飲，一人一杯共叫左三杯。焦糖朱古力賣相吸引，有濃郁嘅朱古力香，加上忌廉，感覺有啲肥，真係適合一啲喜歡飲朱古力嘅人。Rose latte帶有濃濃嘅玫瑰味，而飲落latte 同玫瑰味道平均而唔會太苦或太甜。最後藍柑薄荷梳打非常適合夏天飲，藍色外觀精美，帶有薄荷味，飲落非常涼快，解喝之餘影相呃like一流！