三家村水產 (Closed)

上星期六去左三家村食晚餐，其實之前嚟過，不過以為佢只係食燒海鮮所以冇入去試，今次嚟係比其中一篇食評提到嘅海鮮粥吸引倒而嚟，一入去坐低，即刻 order 個海鮮粥先，足料，如果佢可以用個爐熱住食就一流！跟住點左幾樣海鮮，除左燒，重有其他整法。除左海鮮，重點左其他小食，個糖心蛋，正！從未食過咁好食，油甘魚鮫，咪睇佢好似好少，但有肉既部分好多，食完已經飽到不得了，梗係要食埋甜品先完美啦，點左個燒菠蘿同芝士蛋糕，個菠蘿就唔係好得，生生地，食左兩件都唔係好食倒，好酸，個侍應收碟時我即時反映個菠蘿唔掂，點知佢二話不說幫我取消呢碟費用，我好 appreciate 佢呢個 prompt action, 唔係因為佢幫我慳番幾十蚊，我讚賞既係佢有聽客人嘅反映而作出處理，好多其他餐廳，你講完，佢只會有一句唔好意思就算。另外，不得不提，幫我落單個靚女侍應非常有禮貌而且好好笑容，呢餐，食得非常開心，兩個人食左大約1700。一定會再嚟！