海街丼 (E-Max) (Closed)

咁岩lunch時間係九展，發現到哩間係地牢嘅丼飯專門店，search過平時應該好多人，但今次1230竟然唔駛排隊，即刻試下！ 【是日廚師精選-赤身，中拖羅，日本海膽丼】HKD170 成個set有味噌湯，前菜日式凍辣蕃茄，丼飯同埋一碟仔啫喱咁嘅物體，再加埋杯凍綠茶。 味噌湯正常好味。 日式凍辣蕃茄好有驚喜。我本身唔食生蕃茄，但朋友食完話好好食，搞到我好好奇試一試，點知真係好食！完全冇我接受唔到嘅生蕃茄草青味，少少酸酸辣辣，係似地獄拉麵果種辣味。仲有蕃茄嘅爽口，好開胃。 丼飯嘅魚生好新鮮。赤身實淨魚味濃，中拖羅有油香，海膽鮮甜，完全冇苦味。仲有玉子同三文魚籽。撈埋生磨嘅山葵，正。個飯份量幾大，但本身係熱飯，一開始食落冇壽司醋嘅味，我仲諗點解咁奇怪。再試一試果碟啫喱仔，酸到入唔到口。睇返本menu,原來係壽司醋果凍嚟。跟返個人口味撈入個飯度食，成個觀感fit晒。 食完飲埋杯凍綠茶。舖面環境舒服，雖然燈光暗少少，但坐得都幾鬆動，仲有bar枱位，好有氣氛。有興趣黎食最好都係訂位先。