友記小食店

Open Now

Now Closed

我同爸都好鐘意食麵麵麵麵麵麵，可能因為佢細個個陣有擺攤賣麵，佢對麵既要求都幾高．今次就係因為出左少少糧，就做孝順女請下爸食麵啦．其實呢間友記車仔麵，我自己就成日食架啦，慣曬門口會有條短短地既人龍，一開始就同近門口個阿姐講要咩麵，要咩菜而家都要講埋架啦，跟住就睇下個日有咩餸就指住佢叫就得，最後講埋野飲就比錢，自己再落辣個d啦．成個過程都唔洗五分鐘（選擇困難症另計啦）．叫完就搵個靚位啦，我就叫左牛肚、生菜、柚皮同豬耳米線，爸就要鳳爪、雞翼、生菜 油麵，通常佢都會問你要唔要腩汁，我就次次都要既。其實我覺得最正係柚皮，以前嫲嫲在生會不時整，而家就要係呢度先食到，d柚皮好冧好吸汁，次次食都好有回憶，豬耳細細條幾易入口，生菜同牛肚就無咩特別啦。爸就最欣賞鳳爪，d皮唔會痴住骨，同埋好入味，岩晒佢吮骨。其實街坊老店就唔會話好乾淨，最鐘意都係個份人情味，而家仲有幾多車仔麵會咁花心機整柚皮？仲要咁多餸樣樣都咁新鮮咁好食，keep住好既水準咁多年真係好難得，有時小店真係好難生存，街坊價27文三餸送野飲，每碗可以賺到幾多？平時行多步支持有心既小店其實唔難，真係唔好到小店頂唔順要執個陣先蜂擁去影相懷念啊。